السلام عليكم و رحمة الله و بركاته 

انا بنت و فاضلي ترمين و نص و اتخرج ان شاء الله من كلية اداب... 
المهم انا الحمد لله رب العالمين حاسة قدامي فرص لمجالات شغل مختلفة .... بس من ساعت ما عرفت عن موضوع الظابط المتخصص ده و انا هتجننننننن عليها و
انا بدعي ربنا و بتمنى من كل قلبي اني اتقبل لما اجي اقدم باذن الله... حاسة اني لقيت اللي بدور عليه اخيرا و اكيد الكلية الحربية شرف لأي حد انه ينتمي ليها و لقب اي حد يفخر بيه

المهم انا الحمد لله تقريبا عرفت اجابات اغلب اسئلتي الكبيرة ... بس في كام سؤال كده هما اغلبهم تافهين انا عارفة و اسفة جدا بس عايزة اطمن و مفيش حد قريب مني عنده خبرة في الموضوع

1- الاختبار الطبي و الرياضي للبنات مختلفين عن الولاد في ايه ؟ 
و بذات الاختبار الطبي عشان قريت ان الولاد بيكشفو على كل فتفوتة فيهم ... هل هيعملو كده في البنات بردو و رسم قلب و رسم مخ و هل الايد بتعرق ولا لأ و كل ده ؟

2- بالنسبة للجلدية .... انا عندي اثار حب شباب للاسف الشديد و الحبوب نفسها بسيطة خالص شبه مش باينة ... مشكلتي الاساسية في اثار الحبوب 
هل ده هيأثر؟ انا كنت فاهمة في الاول انهم بيكشفو عن امراض جلدية معدية و انا الحمد لله معنديش حاجة معدية بس لقيت ناس بيتكلمو عن الحروق و حب الشباب و كده فقلقت 

3- اعرف ازاي عندي تقوس ولا لأ ؟ و هل اصلا ده للبنات كمان ولا الولاد بس؟ 
انا رجليا من الركبة للقدم مش لازقين في بعض تماما بس المسافة مثلا 3-5 سم كده.... هل هيأثر ؟ و حله ايه ؟ مع العلم انه مش مأثر جسديا في اي حاجة اطلاقا و اصلا اول مرة اكتشفه 

4- فترة ال6 شهور بتوع الكلية .... البنات بشعرهم المفروض
معلش هو سؤال غبي بس كل اللي في الكلية هيكونو ستات اكيد صح ؟

5- بسمع كتير عن ظباط متخصصين اتبهدلو بسبب سفر كتير و كده او اجازات قليلة .... هل الموضوع ده على البنات بردو ؟ 

6- كذا حد كان بيقول للولاد يمشي مشية عسكرية حتى و هو رايح للكشف الطبي .... ده للبنات كمان ؟

7- كله عمال يقول اهم حاجة الثقة بالنفس و تثبت و كده ..... طيب المكان نفسه و التجربة نفسها مجرد التفكير فيها بيوترني عشان عايزاها و هموت عليها وهيبة المكان و انا اصلا بقلق عمتا في الاول بعد كده ببقى كويسة 
فهل ده هيبقى مشكلة كبيرة؟ و اقدر اتصرف فيها ازاي ؟ الموضوع كبير فعلا و طبيعي الواحد يتوتر  و انا ببقى قلوقة جدا ساعات
و ايه الحجات اي ممكن تديني اولوية عمتا ؟ غير الواسطة

8- البنات ليهم قفزة ثقة ؟ 

9- الفترة الحالية دي اقدر اجهز نفسي ازاي؟  للكلية الحربية بذات
و ايه اكتر حجات بيركزو عليها عموما ؟ اجهز نفسي عليها من دلوقتي 

10 (اخر سؤال خلاص ) .... حد قالي الشرطة هتبقى احسن لك عشان الحربية غالبا بيطلبو من قسمك ولاد بس و قليل قوي لما بيطلبو بنات و طبعا مش هقدر اقدم 10 سنين ورا بعض يعني ... لكن الشرطة بيطلبو بنات اكتر .... ده بجد ؟ 
الشرطة اكيد حلوة جدااااا بس انا نفسي في حربية اكتر 


انا اسفة جد رغيت كتير... بس فعلا هموت عليا و عايزة اطمن اكتر 
 لو اي حد مر بالتجربة دي و عند اي نصيحة ليا يا ريت بجد 
و شكرا جداااااا جدااااااا 
ربنا يسعد الجميع

اه و حاجة كمان انا اسفة جدا
و انا صغيرة وقعت و جزء صغير من سنتي الامامية اتكسر و لسة لحد دلوقتي موجود عشان خايفة اصلحه ...... و السنة اللي جمبها فيها جزء كده فيه زي جزء صغير مش مظبوط
بس مش واجعني ابدا ولا مأثر في النطق ولا حاجة

هل هيعملي مشاكل ؟

mi-17 كتب:

اعتقد ان الضباط المتخصصين في الكليه الحربيه يجب ان يكونوا من الذكور فقط حسب مااعلن في نوفمبر 2015 :

mi-17 كتب:

يمكن ان تستفيدي من الرابط التالي :

شكرا جدا