بما اني خرجت من الكشف الطبي حبيت افيد الناس باليوم اللي كشفت فيه واقولكم خطوات الكشف مع بعض النصائح من التجربة دي ... 
في البداية انت لازم تكون حالق شعرك علي واحد وحالق العانة وتحت الابط وتكون مرتدي السليب الابيض علي شكل سبعة وتكون موجود هناك بدري باذن الله في الاول لما تدخل الكلية هتركب اتوبيس لحد مكان انتظار الكشف وهتعمل حاجة اسمها البصمة بعد كده هتنتظر في مظلة الانتظار وتسمع الظباط وصف الظباط وهما بينادوا علي ارقام التردد وهيحدد من رقم كذا لكذا يخرج للكشف وهكذا بعد ما هتخرج وتتقسم   هتقعد كمان شوية لحد مايجي دور مجموعتك انها تتحرك لمبني الكشف وهتدخل مبني الكشف وتغير هدومك في غرفة التغيير وتنتظر شوية كمان علشان هتقيس وزن وطول ولو طلع وزنك وطولك زي الفل هتنتظر شوية وتطلع للعيادات لو طلعت زيادة وزن او اقل طول هتتعرض علي المستشار وهو اللي هيقرر اما تكمل حربية او تتحول جوية او تخرج نهائياً  هنعدي مرحلة الوزن والطول وهندخل علي العيادات طبعا مجموعتك ليها رقم وحرف زي 7 أ .. او 8ج .. وهتبدأ بالعيادات حسب اللي فاضي مندوبك هيدخلك ليه سواء عظام او جراحة او غيره .. هبدأ انا معاكم بأصعب عيادتين من وجهة نظري وهما الجلدية والعظام وللاسف العيادتين دول بيتصفى منهم كتير جدا 

اولا في العظام بتقف قدام الدكاترة وبيقولوا لك بعض الحركات اللي تعملها زي افرد دراعك قدامك اقف سبعة او اقف 11 وهكذا بيشوف كوعك مظبوط ولا لا وبيشوف الدراع اذا كان معوج ولا لا واهم حاجة بيركز عليها هي الركبة والقدم والساق ودي اهم حاجة عندهم بيشوف التقوس وتراكب الركبتين والفلات فوت وغيرها .... 

ندخل علي الجلدية وده كشف مهم جدا وبيشوف الدكتور فيه اذا كان ايدك بتعرق ولا لا وبيشوف هل عندك اي امراض جلدية او اثار لخياطة واضحة اوي او اثار عمليات في البطن وبيشوف لوعندك اي مرض جلدي او حساسية او حبوب بكثرة واهم حاجة بيركزوا عليها هي عرق الايد 
بعد كده معظم العيادات بسيطة لو كنت سليم فيها وقليل لما حد بيخرج منها 
الرمد مثلا وانت داخل الظابط بيوريك ورقة فيها رقم حواليه الوان ودي علشان يشوف عندك عمى الوان ولا لا وبعد كده بيقفل عين من عنيك وتقوله الدائرة مفتوحة منين والمسافة مش بتبقي بعيدة اوي زي الجوية فسهله محدش يقلق 

عندنا بعد كده الاسنان بيشوف لو سنانك فيه ضرس مسوس او حالته سيئة وبيراجع علي حالة الاسنان بصفة عامة 
فيه بعد كده الانف والاذن وانصحك تكون غاسل ودنك كويس قبل ما تروح علشان متروحش مخصوص علشان كده وده كشف برده سهل بيشوف لو عندك اعوجاج في الانف ويشوف لو فيه ثقب في الطبلة او اي حاجة في اذنك وبيشوف لو فيه اي شئ في انفك .. 

كشف الجراحة ... الكشف ده الصراحة سمعت عنه اقاويل تشيب وشهادة حمرا وكلام هري في هري والكشف كله مش بياخد اكتر من 30 ثانية لو انت بس مخوفتش او متحرجتش الدكتور بيشوف حجم الخصية ولو فيه دوالي وبيشوف لو فيه عمليات قريبة من فتحة الشرج او اي امراض جلدية في هذه المنطقة ... 

كشف الباطنة وده بسيط خالص ومفيش اسهل منه الدكتور بيشوف دقات قلبك وبيشوف بطنك وخلاص علي كده ومشوفتش حد بيخرج منه الصراحة ... 

كشف النفسية وده تقريبا ممكن تلاقيه اتعملك وانت ماشي كده في الطرقة بتاعت العيادات بيقف قدامك ظابط وبيقولك قول 44 و66 وقول اسمك وبيشوف لو عندك لدغة او مخارج حروفك مش مظبوطة وبكده يكون انتهى اليوم الاول للكشف الطبي للذكور ...
اتمني اني اكون افدتكم بحاجة وشكراً