- فيه كلام كتير اتقال عن ان عبدالناصر مسئول عن الهزيمة فى حرب 67  عشان هو دخل فى حرب مع اسرائيل احنا مش مستعدين ليها والنتيجة الهزيمة وضياع سيناء ، عموما انا عاوز اعقب على الكلام ده فى عدة نقاط  مختصرة :
1- قبل الحرب قبل فترة قصيرة جدا اسرائيل اعلنت انها هتهاجم سوريا وتغير نظام الحكم فيها ودا دليل نوايا عدوانية واضحة وكان الهدف من كده جس نبض عبدالناصر فلو سكت عبدالناصر  ده هيشجع اسرائيل انها تهاجم سوريا بدون خوف من تدخل عبدالناصر وساعتها عبدالناصر الكل هيتهمه بالتقصير والخيانة 
2- ومادامت النية عند اسرائيل كانت مبيته  بشكل مسبق لاستدراج مصر وعبدالناصر للحرب فمن البديهى ان اسرئيل هتدور على اى ذريعة لاستفزاز عبدالناصر وحتى لو سكت عبدالناصر ساعتها كان ممكن جدا اسرائيل تبدا تفتعل مشاكل واشتباكات مع سوريا بشكل مستمر لحد ما تستدرج مصر للحرب 
3- ولو افترضنا ان عبدالناصر حشد جيشه فى سيناء من غير ما يسحب قوات الطوارىء الدولية على الحدود مع اسرائيل فده دليل ضعف يطغى على دليل قوة حشد الجيش فى سيناء عشان فى الحالة ديه ممكن جدا اسرائيل تهاجم سوريا وساعتها عبدالناصر هيحتاج 48 ساعة عشان يسحب قوات الطوارىء الدولية وساعتها هتكون اسرائيل حسمت الوضع على الجبهة السورية واتجهت للجبهة المصرية وبكده هيكون رد فعل عبدالناصر متاخر وبعد فوات الاوان ومالوش اى تاثير.

4- وحتى لو كنا احنا اللى بدأنا الهجوم على اسرائيل برضه النتيجة كانت واحدة لان القيادات العسكرية اللى ما نحجتش فى ادارة معركة دفاعية ثابتة هل كان متوقع انها تنجح فى ادارة معركة هجومية متحركة بنجاح ؟!!
5- ممكن حد يقول حتى لو كانت القيادات العسكرية هى المسئولة عن الهزيمة فعبدالناصر برضه يتحمل مسئولية الهزيمة عشان هو اللى عين القيادات ديه  وانا بقول ان لا عبدالناصر ولا اى حد كان يتوقع ان سيناريو الحرب والنتيجة تكون كده لان القيادات العسكرية حتى لو هى فعلا معندهاش خبرة كافية ولا كفاءة  عسكرية كافية فده مش مبرر للهزيمة لان السبب الرئيس للهزيمة كان قرار الانسحاب الغير مبرر والمخاالف لابسط بديهيات العلم العسكرى  .
6- قالوا ان عبدالناصر تعمد توريط الجيش فى هزيمة عسكرية عشان يخلص من المشير عامر مع ان عبدالناصر حتى بعد ما عزل المشير بعد الهزيمة وحمله مسئولية الهزيمة ما حاولش يحاكمه او يعتقله وما عملش كده الا بعد ما المشير عامر حاول يعمل انقلاب عسكرى ضده 
7- قالوا كمان ان عبدالناصر متواطىء مع اسرائيل وانا بقول لو كان فعلا متواطىء هل اسرائيل هتعرضه لهزيمة بالحجم ده وبالقسوة ديه واللى هتأُر بشدة على مكانته وهيبته وشعبيا محليا وعربيا ؟!!!
8- وايه اللى يضمن لعبدالناصر ان اسرائيل بعد الهزيمة مش هتغدر بيه خصوصا ان الطريق كان مفتوح قدام الجيش الاسرائيلى للقاهرة؟!!!
9- اسرائيل عرضت على عبدالناصر انها ترجع له سيناء بشرط تخليه عن قضية فلسطين والعرب وعبدالناصر رفض
10- عبدالناصر شن حرب استنزاف رهيبة ضد اسرائيل لمدة سنتان كبد فيها اسرائيل خسائر كبيرة جدا مادية وعسكرية واقتصادية بعد شهور قليلة من هزيمة 67  فى اصعب الظروف وباقل الامكانات ومع كده اسرائيل طلبت وتوسلت لعبدالناصر عشان يقبل وقف اطلاق النار ووافق عبدالناصر من موقف قوة 

تأملات تاريخية  الجزء الرابع 
11-  القائد اللى جيشه لسه طالع من هزيمة شديدة وفقد معظم اسلحته وروحه المعنوية منهارة وارضه محتله بقدرة قادر يتحول لجيش جبار ويحارب بالروح ديه والكفاءة ديه سنتين كاملين يبقى قائد وطنى وكفء واستحالة يكون قائد فاشل 
12- عبدالناصر لما وافق على وقف اطلاق النار سنة 1970 كان بيستعد لحرب التحرير ثم توفاه الله بعد وقف اطلاق النار بحاجة بسيطة  تخيلو اللى بيقولو ان عبدالناصر مكانش هيحارب لو ربنا مد فى عمره شوية !!!! ازاى؟ اذا كان هو اثبت جديته فى حرب اسرائيل لمدة سنتين كاملين رغم انها بدأت من غير استعدادات كافية وامكانيات كافية !  وشافت اسرائيل الويل !! تخيلو لما عبدالناصر يدخل حرب لتحرير سيناء ضد اسرئيل تخيلوا كان ممكن جيشه هيعمل ايه فى اسرائيل وهو داخل الحرب باستعدادات كافية وامكانيات كافية ؟!!!
13- ختاما اللى قالوا ان عبدالناصر افتعل مظاهرات بتطالبه بالعودة بعد التنحى ! عاوز اقولهم والملايين اللى خرجت فى جنازة عبدالناصر ديه برضه كان تمثيلية مفتعلة ؟!!!!!



 

يتبع

شكرا لمقال حضرتك