إخوانى أعضاء المنتدى
موضوع النصب ده رأيته فى احد المنتديات فحبيت انبه الجميع
حتى لايحدث معكم هذا
الموضوع بالنص
السلام عليكم ورحمة الله وبركاته
أتصلت بى نمرة تبدأ ب 019
حوالى الساعة السابعة والنصف من مساء اليوم
كان المتحدث يقلد طريقة موظفى خدمة العملاء..
يعنى نص كلامه يا أفندم
مساء الخير يا فندم
مع حضرتك حبشتكتوت(كلام بسرعة ما فهمتوش) يا فندم حضرتك نمرتك كذا كذا يا فندم
مبروك يا فندم حضرتك كسبت معانا فى السحب يا فندم عربية BMW موديل 2008 i116
حضرتك تروح تستلم الجايزة من ميدان سفنكس بالمهندسين أو من ..... المعادى يا فندم
حضرتك يا فندم تاخد صورة البطاقة يا فندم وصورة عقد الخط بتاع حضرتك يا فندم..
ألف مبروك يا فندم..حتوصل حضرتك دلوقتى يا فندم رسالة تأكيد على رقم حضرتك يا فندم..
وح تكسب 1000 جنيه كمان يا فندم رصيد يا فندم..بس لازم تشحن رصيد ب300 جنيه يا فندم..
3 كروت 100 أو 6 كروت 50 جنيه يافندم و1000 مبروك يا فندم..وفى خلال عشر دقايق بس من وصول الرسالة يا فندم..
وراح قفل الخط..
قلت لزوجتى تطلب خدمة العملاء تتأكد من الحكاية دى من موبايلها...أصل الفار
لعب فى عبى بصراحة..لأنى طول عمرى بأحذف رسائل فودافون التى تخبرنى بأن
أتصل برقم كذا علشان أدخل على سحب كذا..وعلشان كمان هو قال لى العربية
موديل 2008 رغم إن من العادة إن أى سيارة جائزة تكون موديل السنة مش موديل
قديم..وبعدين علشان قال لى فى خلال عشرة دقائق لازم أشحن ومش عارف إيه وجه
الإستعجال..
المهم لم تمر دقيقة واحدة وأرسل لى نفس الرقم رسالة:
تم نقل 1000 جنيه لك من 010 وبعدها رقم مميز
المرسل فودافون..دلوقتى إشحن أسرع وأسهل فقط أطلب #رقم الكارت *858*
وقبل ما ألحق أقرأ الرسالة إتصل بى نفس الرجل من نفس الرقم..أيوة يا فندم حضرتك شحنت..
قلت له لأ لسه..
يا فندم لازم تشحن فى خلال عشرة دقائق يا فندم
طبعا زوجتى كانت لسه يا دوب بتحاول تطلب خدمة العملاء وطبعا لازم نسمع
الأول شوية رسائل صوتية ظرييييييييفة لغاية ما يدونا رقم خدمة العملاء
ولغاية ما حد يرد عليك تكون عينك طلعت..
المهم..قلت له طيب إقفل وكلمنى بعد عشرة دقائق..
قال لى لأ أنا معاك على الخط يا فندم مش ح ينفع أقفل يافندم أنا معاك لغاية ما تشحن يا فندم..قلت له بس أنا لسه ح أنزل أجيب كروت شحن من تحت..قال لى أنا معاك على الخط يا فندم..الفار لعب فى عبى أكتر..
هو عايزنى أفضل على الخط علشان يضمن إنى ما كلمش حد
المهم مراتى قالت لى ..خدمة العملاء بيقولوا ده نصب وما فيش مسابقة ولا عربيات لا بى إم ولا أى نوع آخر..
قفلت السكة فى وش الراجل من غيظى..
إتصل بى فى أقل من 5 ثوانى..إيه يا فندم حضرتك قفلت السكة ليه يا فندم؟؟..
قلت له علشان إتصلنا بخدمة العملاء وقالوا لنا ما فيش حاجة من الكلام ده وده شغل نصب يا فندم..قال لى طب أنا شاكر لحضرتك يا فندم..قلت له العفو يا فندم..وقفل السكة..
كلمت خدمة العملاء تانى من تليفونى وأعطيت لهم الرقم علشان لو يقدروا
يتصرفوا أو ينشروا تحذير للناس..وأكدوا لى إن ما فيش حاجة من الكلام ده
فعلا وإن الموضوع كان ح يبقى فيه نصب..
بس أنا بصراحة ندمت إنى لم أجارى الرجل لإكتشف كيف كان يريد النصب علي..
فإذا كان عند أحد علم أو يعرف أحد تعرض لهذا النصب وإيه آخر القصة ..يا ريت يقول لى
ويا ريت تنشروا التحذير ده بين معارفكم علشان ما حدش يتعرض للنصب..
وكل BMW i116
وإنتم بالصحة والسلامة يا أفندم
http://www.egyptsons.com/misr/thread140749-1.html

بس للاسف واحد تانى وقع فىالفخ
وايه اللى حصل
اخد منه ارقام الكروت وقفل فى وشه الموبايل
راح الشركة اكتشف انها عملية نصب
والشركة معملتهوش حاجة
وطلعت الشركة عارفة الموضوع واتنصب على ناس كتير قبل كده
والشركه لم تبعث بتحذير ولا غيره
شكل الشركة متواطئة هى كمان ولاايه.

ليست متواطئه ولاشئ ، لقد استفادت بهذه الكروت وانهت الموضوع ، كل ماستفعله انها ستوقف الخطوط ، والف شكر للنصيحة اخي علاء .

هههههههه شيء غريب طب مصلحتهم ايه

حتى النصب وصل للمحمول حسبنا الله و نعم الوكيل

حسبنا الله ونعم الوكيل النصب من النوع ده كتير انا جالى رسالة على موبايلى انى كسبت عربية فى مسابقة ولازم اروح احط مبلغ فى البنك علشان استلمها وكل ده نصب فى نصب اوعوا تصدقوا النصب ده