السلام عليكم ...



صباحكم فل وياسمين ...



امبارح اتمسك اتنين حرامية في شارعنا - واللي يعتبر هاديء نسبيا - ودي أول مرة في حياتي اشوفها ...



بس الحمد لله انهم اتمسكوا وأكلوا علقة جامدة جدا من أهل المنطقة لحد ما البوليس جه ...





الحرامي الأول :::



حوالي الساعة 4 العصر ... سمعنا واحدة بتصوت -ما شاء الله صوتها جاب لآخر الشارع والشوارع المجاورة -



واتضح ان الحرامي كان راكب موتوسيكل صيني -الله يجازي اللي دخله مصر- وحاول يسرق شنطتها فصوتت



فارتبك واتزحلق بالمتوسيكل , فسابه وساب الشنطة وحتى الشبشب وجري ... لكن على مين ... التتار جري



وراه ومسكوه وضربوه العلقة التمام وعدموه العافية واتصلوا بالبوليس اللي وصل في 5 دقائق تصدقوا ... حاجة



محترمة جدا ... وقبضوا على الحرامي واخدوا الموتوسيكل . وبعديها وصل عربيتين شرطة كمان بس قلنا لهم



خلاص جت عربية وخدته ... استجابة ممتازة بصراحة واحترام متبادل بين الشرطة والناس وسلموا على بعض.





الحرامي التاني :::



حوالي الساعة واحدة بالليل ... معرفش التفاصيل قوي ... بس هو كان حوالي 18 سنة والناس مسكته برده



لحد ما البوليس جه واداله علقة جامدة قوي وهو يقول والله ما هاعمل كده تاني ووووو ... وبعد كده سابوه



معرفش ليه ... بس الظاهر انها اول مرة ليه أو صعب عليهم .





الايجابيات :::



1- الاستجابة الرهيبة من الناس للصرخة والايجابية الممتازة اللي بقوا فيها .



2- التعاون مع الشرطة والاتصال بيهم .



3- الاستجبة السريعة جدا من الشرطة والوصول باعداد كبيرة.



4- الاحترام المتبادل بين الناس والشرطة.



5- الناس هما اللي بلغوا الشرطة بمكان وجود المتوسيكل ... وما اخدهوش غنيمة ...:)



السلبيات :::



مفيش بصراحة ...



الحمد لله ان الموضوع عدا على خير وانهم اتمسكوا بس دي اول مرة تحصل وده مؤشر مش كويش.



ربنا يكفينا شرهم ويعننا عليهم .



شكرا ...

الموضوع جميل وبيبين ايجابيات الشعب المصري وانو لسه فيه خير

بس حلوة الحتة بتاعة مخدوش المتسكل غنيمة دي هههه

الشعب مينفعش يعيش من غير الشرطة ابداااااااااااااااااااااااا