بكتشف انى احيانا مش بتعلم من اخطائى :
ايام عيد و كل سنة و احنا طيبين.. عملت فيها الشيف و الكبابجى الشهير (زى السنة اللى فاتت) و قلت للولاد حشويلكم كفتة... و تجاهلت نظرات الولاد الممتعضة و خصوصا عمر الصغير اللى رفع جانب شفته العليا لأعلى...
طلعت بره فى الروف و قعدت احضر فى حاجات و اطلب طلبات...هاتولى اللحمة المفرومة ..هاتو التوابل الهندى و الزعتر النوبى و المعرفش ايه المغربى و الأبصر ايه الفوشيا و الفحم المعتق ...
و رحت اولع فى الفحم و هو ولا هنا ... اصدرت فرمان باحضار جاز من تحت الارض..طبعا نزلت ادور على لتر جاز و دخت دوخة الخواجة بيجو... المهم جبت الجاز و حطيته عالفحم و الدنيا ولعت...
هاتو الاسياخ ... و قعد المعلم يصبع فى الكفتة و يرص ...
شوية و الدنيا اتملت دخان و هباب من كل حدب و صوب ...
و يقولولى ايه ده ؟... قلتلهم شوية و النار حتصفى يا جهلة ...
اذا كان نار المفاعل العراقى و نار تونس و نار دير الزور و نار اليرموك بتصفى ..يبقى نار الشواية لأ ؟!!!
بطلوا جهل بقى...
شوية و لقيت شبابيك الجيران اللى جنبنا بتترزع فى وشى واحد ورا التانى ... مش عارف ليه !!!!
بصيت بقرف و قلت انا مالى ..خلينى فى الكفتة...
و قعدت اقلب فى الاسياخ بأيد و حاطط التانية على خدى..
و سرحت ... يعنى انتى يا اسرائيل مش لاقية حد يقف قصادك ؟؟
طب و اللى بيحصل فى سينا ؟؟؟...طب و لو حبيتى تدخلى سينا حنتصرف ب كذا و كذا ولا كذا و كذا.. طب صبرك شوية لما الجيش يجيب ال.....و ال..... ولا هى الحكاية .....؟!!!
و عمال اقلب فى الاسياخ ...
و قال ايه الاف 35 اخترقت المجال الجوى المصرى..اسلحة سرية بقى...تلاقيها طالعة من المطارات السرية فى الدولة السرية و العالم السرى... خليها فى سرك دى عالم تخلى الواحد يطق من جنابه....
و اقلب فى الاسياخ....
و هى ايران لما تروح تبعت حتتين من البحر ياخدوا بقايا الحاجات الايرانى اللى طلعت من الانفجار يبقى ..............
يا عينى عليكى يا سوريا و على مواقع الدفاع الجوى اللى عمالة تتساقط و تخرب و اللى هو كان يشبه الطلاسم و مخوف اسرائيل.....
شوية و الاقى الواد عمر الصغير طالعلى من جوه و بيكح كحة وحشة... و بيقولى الدخان ملا الشقة ...
و بيبصلى بدهشة و بيضحك...!!!!!
قلتله بجدية و تكشيرة : فى ايه يا ولد ؟
قالى وشك اسود اوى...
ببص عالكفتة لقيتها هى و الفحم واحد....
خدت بعضى من سكات و لميت الدور و دخلت اتسحب...
و فتحت التلفزيون ..كان فيه فيلم لاسماعيل ياسين و لقطة و هو فى سراية المجانين بيغنى معاهم :
عينى على ينى و خمرة ينى....
موضوع: اسرائيل عالفحم 
الأربعاء 31 أكتوبر 2012 - 23:45
