وجدت هذه الكلمات عند احد اصدقائى (غالبا منقوله من شخص ما او صفحة ما لا اعلم )
بكن هى تجربه اكتشفت ان معظم من تم تجنيدهم للخدمه الوطنيه خاضوها
أتعلمت من الجيش المصرى
1- أتعلمت من الجيش أن النوم الساعة 8 أو 9 بعد العشا أمر طبيعى جداً ومش مستحيل أنى أصحى الساعة 5 الفجر
2- أتعلمت من الجيش أن حلاقة الدقن كل يومين أو كل يوم روتين كأنى بغسل وشى
3- أتعلمت من الجيش أنى أخد دش بمية ساقعة تلج الفجر أو بالليل فى عز التلج دة أحسن من سخان أولمبيك
4- أتعلمت من الجيش أنى أغسل لبسى على أيدى كل 3 أيام وأكتشفت أنى أيدى أحسن من الغسالة الأتوماتيك
5- أتعلمت من الجيش أنى العب رياضة كل يوم الساعة 7 الصبح والجرى 3 كيلو دة أحلى من المشى
6- أتعلمت من الجيش أن النظافة من الايمان مش بس هنضف عنبرى ولا سريتى ولا كتيبتى بس دة أنضف المعسكر كله كمان
7- أتعلمت من الجيش انى مسبش سريرى مبهدل زى ما بنقوم كل يوم لا دى البطاطين بتتفرش بطريقة معينه وبتحاسب عليها
8- أتعلمت من الجيش أنى أغسل سنانى مش زيكم أطلع بريحة البصل عشان فيه ألف واحد هيشموا ريحتى :D
9- أتعلمت من الجيش أن الموبيل والفيس والتلفزيون والحاجات اللى متقدروش تستغنوا عنها دى بتجيب الأكتئاب اة والله تقعد تعرف فى أخبار البلد وتحزن لكن لما نقعد 50 واحد مع بعض كل واحد يقول نكتة يبقى أحلى دلع
10- أتعلمت من الجيش أنه هيخليك أجتماعى هتتعرف على بتاع الأمن عشان تدخل بموبيل بكاميرا وهتتعرف على الظابط عشان يظبطك أجازات وهتتعرف على الخمسين واحد اللى معاك فى العنبر وووو يعنى الجيش هيديك كورسات تنمية بشرية
11_ أتعلمت من الجيش أنى أكون مواظب على الوقت بالظبط فالأكل بميعاد والصحيان من النوم بميعاد ثابت وخدمتى ليها ميعاد ثابت
12- أتعلمت من الجيش أن الفول والعدس من أحلى الوجبات اللى فى الدنيا مش أقولهم فى البيت الأكل دة من أمبارح وبايت
13- أتعلمت من الجيش أنى لا أشتم حد ولا أقل أدبى على حد لو حد ظلمنى هيتحاسب كله بالعسكرية والقانون
دى حاجات قليلة من ملايين الحاجات اللى كل واحد دخل الجيش فينا هيتعلمها ياترى بقى بنكره الجيش لية ؟؟
موضوع: تعلمت من الجيش المصرى 
الجمعة 28 ديسمبر 2012 - 19:57
