السلام عليكم

النهاردة كان اول يوم فى سحب الملفات 24/11/2012

الكلية الحربية فى مصر الجديدة

انا ركبت اتوبيس 105 او 314 اللى رايح صلاح سالم وده بينزلك على باب الكلية على طول

باب سحب الملفات مفتوح اسبوع بس تقريبا

وتسليم الملفات هيكون 14/12 /2012

وانت داخل هتقرا التعليمات وفية ظابط استعلامات ممكن تسالة على اى حاجة قبل ما تدخل او على تخصصك ا كليتك مطلوبة ولا لا

وانت داخل بتتفتش ( ممنوع موبيل ممنوع سجاير ممنوع ولاعة ) دى الكلمة اللى سمعتها من العسكرى وانا داخل

واللى معاه موبيل بيسيبة مع واحد فى الشارع ويخبط ويديك صورة بطاقة ويخبط منك 10 جنية وانت خارج ( نصيحة من اخوك متخدوش احسن )

بتدخل وهو بينادى بالكليات بس رجع كل الناس اللى معاهد

بتدخل فى طابور كليتك تدفع ال 90 جنية ويشيك على بطاقتك ( الرقم القومى لازم تكون معاك )

بعد كدا هتروح تتوزن كله طبعا فى طابور

بعد كدا بتدخل تتصور وتعرف انت اتصورت فى صالة كام ودفعة كام عشان دة الرقم اللى هتستلم بيه صورتك

بعد كدا روحنا قاعة ( اسمها يوسف السباعى ) شرحلنا ازاى هنملى البيانات اللى فى الملف

وخرجنا نستلم الصور ودى كانت اكتر حاجة طولت

وبالتوفيق للجميع ان شاء الله[b][center]

الحلقة ( 2 ) تسليم الملف

النهاردة كان يوم تمام عشان الجو برد حاول تلبس تقيل :D....... 15/12/2012

احب ااكد وانت داخل الكلية لاول اختبار ليك خليك واثق من نفسك ومتاكد 100 % انك لو ليك رزق فية مفيش قوة فى الدنيا هتمنعك

اولا انت هتدخل من تانى بوابة اللى هيا عند مسرح يوسف السباعى
هتتفتش تفتيش جامد المرة دى فمحدش يحاول يتزاكى ويخبى موبيل والكلام دة يستحسن متدخلش بيه

هتعرف كليتك وكل مجموعة كليات موجودة مع ظابط

هتروح تقعد معاهم لحد ما ينادى تخصصك او كليتك عشان تسلمة الملف

هيتمم عليه وبيتاكد من ( موقف الجيش و شهادة التخرج وشوية حاجات )

المهم لو ملفك سليم هياخدة بالحافظة ويديك ورقة اجابة سمات ويحطلك رقم القيد على بطافة التردد

هتروح تستنى فى قاعة المسرح تانى وتسجل اسمك جمب رقم القيد

هتدحل اللجنة بيتوزع نمازج مختلفة مش كل الناس زى بعضها

وهما 50 سؤال فى 16 دقيقة ( وليه مش 15 مش عارف )

المهم االاسئلة منها معلومات عامة كانك فى من سيربح المليون :D

وفى اسئلة سهلة تخص شخصيتك

وشوية اسالة حساب زى حجم المخروط حاجات حساب سهلة ان شاء الله

المهم يعنى تحل كل اللى تعرفة ومتسبش سؤال فاضى ( ما فيش ولا سؤال من كتاب الوزارة )

بتسلم اجابتك وتعرف معاد النتيجة

بالتوفيق للجميع[b]

الحلقة (3) الكشف الطبى

بسم الله الرحمن الرحيم

اولا: احب اهني كل اللي نجحوا في الكشف الطبي في التلات ايام اللي فاتو واللي ماتوفقش اقوله معلش الدنيا مش واقفة على المكان ده وان شاء الله تلاقي نفسك في الحياة المدنية (واللي انا واحد منهم )

ثانيا: انا يا جماعة لسة نازل من مصر امبارح فسامحوني اذا كنت انا او اي حد مش بنزل اي معلومات عن الكشف الطبي لان بجد الموضوع مكنش بايدينا احنا كنا بندخل الكلية الساعة 6 وبنخرج ع الساعة 3.30 وكان موضوع متعب جدا وفيه ناس كانت بتبات في مبيت الكلية وناس بتروح عند قرايبها في مصر وناس على بال ماتسافر وتروح يكون عاوز يعمل حاجة واحدة بس ان هو ينام ويقوم بدري عشان يسافر تاني

ثالثا : انا كاتب البوست ده مخصوص للى وراهم كشف طبي ان شاء الله بداية من بكرة لحد يوم 31/12 تقريبا وان شاء الله هاكتب كل حاجة حصلت بالتفصيل عشان اي واحد اول يوم ليه او تاني يوم ليه لسه مجاش يبقى على نور باللي هايحصل معاه هناك .

الكشف الطبي للاكاديمية الحربية

بداية انتوا هاتقفوا طابور طويل خارج الكلية جنب السور في انتظار الدخول وهاتدخلوا بسرعة ان شاء الله ع الساعة 6.30 يعني اللي عاوز يصلي الفجر يصلي براحته ويروح وفي مسجد هناك برة الكلية اسمه مسجد عثمان بن عفان الكلية الحربية لو عاوز تصلي فيه قبل ما تدخل... واول ماتدخلوا الكلية ان شاء الله هايقسموكوا صفوف ويبدأوا يفتشوكوا وممنوع دخول الموبايلات والشنط

لازم يكون معاك ..... ابيض سبعة طبعا كلامي مفهوم لان لو خلعت هدومك ولاقوك لابس حاجة تانية هايرجعوك ويقولولك اشتري من برة من نفس الناس اللي بيشيلوا الموبايلات معاهم وبـ 5 جنيه تقريبا الواحد.

بعد تفتيشكوا هاتعدوا الى مكان تاني وتقفوا حوالي 7 صفوف وهايبدأوا يوزعوكوا على 3 شبابيك لما توصل عن اي شباك فيهم هايسألك على رقم قيدك وبعدين ياخدوا منكم بصمات الابهام اليمين والشمال

بعد كده هاتروحوا على مظله كبيرة فيها كراسي كتير هاتقعدوا وهايبدأ الصول ينادي بأرقام القيد من الورقتين بتوع الكشف الطبي اللي كانوا ف الملف ( هما مدبسينهم ف بعض وشايلنهم من الملف عشان في كل كشف الدكتور يكتب لائق او غير لائق)

اللي هايسمع رقم قيده هايقول افندم ويقوم يقف في طابور مع الناس اللي ارقامهم اتنديت بردو لغاية ماتوصلوا 40 واحد ودي اسمها مجموعة ( يعني مثلا الـ 40 واحد دول هايبقى اسمهم مجموعة 1أ او 2أ وهكذا أو 1ب او 2ب وهكذا يعني المجموعات متقسمه على أ و ب ) وكل مجموعة معاها مندوب (عسكري خدمة)

مجموعات أ كشفهم مع دكاترة غير مجموعات ب وتبقى بس هي هي نفس الكشوفات وتبقى محظوظ اكتر لو دخلت مع مجموعات ب لان دكاترتهم بالذات في العظام والاسنان
مش متشددين أوي بس طبعا مش بإيدك تدخل مع اي مجموعة لانه حسب ما رقمك يتندى

هاتبدأ المجموعة تتحرك وتدخل على المجلس الطبي للكليات والمعاهد العسكرية وهايدخلوكوا على غرفة خلع الملابس اولا هاتقلعوا كل حاجة ماعدا ال.... الابيض السبعة والفانلة الحمالات البيضاء او فانلة نص كم بيضاء وطبعا عشان البرد ولو تعرف تجيب اكتر من فانلة نص كم بيضة تلبسهم فوق بعض تبقى برنس البرانيس ومش هاتحس بالبرد لان البرد هناك فظييييييييع وتقريبا المكان مش بيدخله الشمس مش عارف ليه :)

بعد ماتقلعوا هاتلبسوا اكياس في رجليكم زرقا ( قال يعني هاتحميكم) وتقعدوا في انتظار دخول اول كشف اللي هو القوام

مندوب المجموعة هايدخل ورقكم لطبيب المسئول عن كشف القوام وتبدأوا تدخلوا بالترتيب على الكشف وده اللي بيحصل في كل الكشوفات

اول يوم بتكشف 8 كشوفات وهما اهم بكتير من كشوفات اليوم التاني

ال 8 كشوفات هم ( قوام - باطنة - جلدية - جراحة - نفسية - رمد - أسنان - عظام )

القوام: وهو الكشف الوحيد اللي لو حد خرج منه مش بيكمل بقية الكشوفات وبيروح مع الاسف بس قبل مايروح بيتعرض على مستشار واللي ممكن يرجع واحد او اتنين ويكملوا بقية الكشوفات معانا والباقي بيروح.

الكشف عبارة عن ميزان الكتروني اكثر تطورا من اللي وزنت عليه وانت بتسحب الملف و فيه واحد ارشاد صوتي في الجهاز هايقولك اضغط على الزر الاخصر (مرسوم عليه جسم رجل والاحمر مسوم عليه امرأة) مش عارف ازاي بيعرف الصراحة :) وبعدين بيبدا يوزنك ويقيس طولك ويقولك شد الورقة اللي هاتطلع واللي بيبقى مكتوب فيها وزنك وطولك بس ( مفيش عرض)

الناس اللي عديت ف الوقام هايطلعوا صفين جنب بعض الدور التاني عشان يكملوا بقية الكشوفات

الباطنة: من اسهل الكشوفات ..بتنام ع الشازلونج بيبص ف عينك الاول مش عارف ليه وبعدين بتدي وشك للحيطة وهايقولك خد نفس وخرجه من بؤقك وهو بيضغط على بطنك وبعدين هايقول اللي بعده (لو قال اللي بعده اعرف انك عديت الكشف ده بسلام)

الجلدية : بيشوف اي امراض جلدية في الجسم او في فروة الرأس
هايقولكوا افردوا ايديكم للامام وصوابعكم مفتوحة عشان تقريبا يشوف حد عنده تنية او اي حاجة تانية وبعدين ادوا وشكوا للحيطة عشان يشوف امراض جلدية في الضهر او حاجة
وبعدين هايقول اقبض على ايدك بصوابعك كذا مرة عشان يشوف ايدك بتعرق ولا لا وبس كده ولو سأل واحد عن اسمه اعرف انه لالاسف وقع في الكشف ده

الجراحة: غنى عن التعريف انت بتنزل الابيض السبعة وكل زماليك في المجموعة وشها للحيطة عشان مايشفوش حاجة طبعا :) وهايبدأ يشوف لو عامل عملية او حاجة قدام او ورا وبيبقى في دكتور تاني أعلى ف الرتبة بيبقى قاعد ع المكتب وبيكتب اذا كنت لائق او غير ولو الدكتور اللي بيكشف عليك ملاه حاجة يبقى انت كده للاسف وقعت ف الكشف ده ولو قالك عدي يبقى انت الحمد لله تمام

نفسيه : اقف ثابت افرد ايدك للامام افرد صوابعك وبعدين يبدا يشوف لو في ناس واكله ف صوابعها بشكل مثير للانتباه او بدرجة كبيرة ممكن يوقعه ف الكشف ده وبعدين
هايقولك قول 44 66 عشان يشوف الناس اللدغ اللي للاسف ممكن يقعوا ف الكشف ده

رمد : هايفتحلك كتاب فيه كذا رقم زي اللي موجود في اللينك ده بالظبط http://www.asaher.com/testco/test1.php
عشان يشوف عمى الالوان وبعدين كشف الدواير المفتوحة ده وبيبدأ من تحت لفوق وبعد اما تخلصه هايقولك بص على صباعي ويبدا يحركه في جميع الاتجاهات عشان تقريبا يشوف عندك نسبه حول او حاجة ولو لقدر الله معرفتش تقول الارقام بيقولك اتفضل ومش بتكمل الكشف وبتقع فيه ولو قلتها صح بتقول الدواير ولو في عين من العينين نظرها اقل من 9/6 لالاسف بردو مش بتكمل الكشف وبردو بتقع فيه .

أسنان : دكتور زي العسل (بالنسبة للمجموعة ب هايقولك ركز على سنانك ويشوفها متسقة ولا لا وبس وحتى لو مش متسقة اوي هايعديك انما بقى بالنسبة للمجموعة أ كانوا بيتنفخوا صح وكان الدكتور بيقعدهم على كرسي ويفتح بقهم ويشوف عندهم تسوس او او او ....

عظام : كشف مجزرة بيخرج ناس كتير جدا.. اول حاجة هايقولها اقف انتباه طبعا عشان التقوس والناس اللي عندها كتف اعلى من كتف وبعدين شب واقف على اطراف صوابعك وبعدين انزل ربع ع الارض وبعدين ادي وشك للحيطة و اركس على ركبك وبردو على اطراف صوابع رجلك وبعدين امشي 3 خطوات للامام وكل حاجة من دي بتبين حاله معينة واللي يعلق عليه او يكتب او يعلم على جسمه بعلامة بالقلم ويقوله اطلع اقف في النص هايبص عليه الدكتور الاعلى ف الرتبه ويشوف اذا كان يعدي ولا لا وغالبا مش بيعدي

وفي نهاية الكشوفات هاتروح تلبس هدومك وتقعد في نفس المظله اللي دخلتلها ف الاول في انتظار نتيجة كشفك

هاييجي الصول ينادي على اسم المجموعة هاتقف صف ويبدأ ينادي على الناس اللي ملهاش نصيب واللي هما بيقعوا في كشفين او اكتر في اليوم ده بس اما اللي بيقعوا في كشف واحد بس بيكملوا تاني يوم عادي ولو تاني يوم عدى عليهم بسلام بيتعرض على مستشار ويشوف اذا كان لائق او لا في الكشف ده (غالبا بردو نسبة لا تتعدى 5% اللي بتعدي)

ملحوظة: انت لو وقعت في كشف واحد بس مش هايقولك وقعت في ايه هو هايقولك تعالى تاني يوم عادي صايم عشان تكمل باقي الكشوفات بس انت بتعرف اذا كنت وقعت او لا في كشف معين من خلال كلام الدكتور او اذا سألك على اسمك

نيجي بقى لكشف تاني يوم وهم ( تحاليل بول ودم - اشعة على الصدر - رسم قلب - قلب - قاع عين - موجات صوتية)

نفس الكلام في اليوم الاول بس اللي هايكشفوا تاني يوم بيقعدوا في اخر المظلة واللي بيكشفوا اول يوم بيقعدوا في اولها ودول ليهم صول بينادي على ارقامهم ودول ليهم صول تاني ينادي على ارقامهم .

هايبدا الصول ينادي على ارقام القيد وبنفس طريقة اليوم الاول بتخش على عيادات اليوم الثاني بس قبل ماتخش هايحطلك القطرة البشعة اللي بتزغلل عينك وبتخليك دايخ الى حد ما عشان كشف قاع العين

تحاليل بول ودم : فيه عسكري هاينادي على ارقام القيد واللي يسمع رقمه بيديله عدد 4 استيكر مكتوب عليهم رقمه ودول اللي هايتلزقوا على الانابيب بتاعة التحاليل اللي هما 3 انابيب رفيعة كل واحدة لون ( كل واحدة لتحليل مرض معين في الدم) وعلبه صغيرة شفافة عشان تحليل البول
هاتدخل عيادة التحاليل يسحب منك عينه حوالي 5 سم وياخد منك الانابيب الملونة وبعدين تروح انت ع الحمام تحلل بول ف العلبة وتسيبها ع الترابيزة في الحمام وهما هايخدوها..

اشعة على الصدر : بعد ما مجموعتك كلها تخلص اول كشف هايودوكوا على عيادة الاشعة على الصدر بتدخل جوة بيبقى فيه تكييف يالهوييييييييييي على ده برد تحس انك في القطب الشمالي والتكييف ده عشان الجهاز مايسخنش بتاع الاشعة
هاتقلع الفانلة البيضة اذا كنت لابسها وهاتعرض صدرك وانت واقف لجزء مربع في الجهاز الي هو بيصور صدرك وبعدين بتخرج...

بعد ما مجموعتك تخلص الاشعة على الصدر بتطلعوا الدور التاني عشان بقية الكشوفات

رسم القلب : بتنام على شازلونج ويبدا يحط جل على صدرك عشان هايلزق حاجات في اماكن متفرقة في صدرك تقريبا بتقيس موجات القلب والنبض وكده وهايشبك حاجات في ايدك الاتنين ورجلك الاتنين متوصله بالجهاز .

الجهاز هايطلع شوية تموجات كده ( رسم القلب بتاعك ) واللي بيعملك الرسم هايسألك على اسمك ويكتبه على ضهر الورقة اللي عليها الرسم وبتوديها للضابط الطبيب المختص اللي بيحدد قلبك عامل ايه وبتخرج

كشف القلب : بيحط السماعة على صدرك ويقيس نبض القلب وخلاص وبعدين يعديك

قاع العين: بتدخل تقعد تقرب وشك من جهاز صراحة مش عارف اسمه بس زي اللي بتشوفه عند دكاترة العيون وبتحط عينك في دايرة كده زي العين السحرية وهو من الناحية التانية بيفحص عينك

موجات صوتية : بيكشف عليك بجهاز تقريبا هو السونار...بيحطلك جل على بطنك الاول لسهولة حركة السنسور اللي هو الجهاز الحساس اللي بيمشيه على بطنك وبيبدأ يكشف على الكلى ويشوف لاقدر الله لو واحد عنده حصوة او اي شئ على الكلى

ملحوظات عامة :

لو واحد جه متأخر ع الساعة 9 كده مش هايدخلوه الكلية بس ماتخفش هاتيجي تاني يوم عادي بدري وهاتدخل تحت اسم متخلف ( اسما بس) بس هايتندى اسمك ف الاخر خالص وهاتكشف عادي جدا

لو في طالب ظابط مشاه وقاله البس هدومك وامشي تحت مسمى عدم الانضباط مايجدلش معاه هو بس بيخوفك وهاتيجي بردو تاني يوم عادي وهاتكشف عادي

حاول تلبس اكتر من فانلة بيضة نص كم فوق بعض عشان الدنيا بتبقى برد جدا والحاجة الوحيدة اللي مسموحلك تلبسها هي الفانلات البيضة النص كم او الحمالات..

ياريت ياجماعة اللي معاه موبايل مايدخلش بيه لانه لو اتمسك بيه فعلا الموبايل بيتكسر وهايخرجك برة تديه لاي واحد من اللي واقفين برة زي اللي كنا بنشوفهم واحنا بنسلم الملف كده وهاتديله 10 جنيه في اخر اليوم عشان تاخد موبايلك..
ابقى حط موبايلك في امانة مسجد عثمان بن عفان اللي انا قلت عليه ف الاول وهاتدي الراجل 5 جنيه وانت بتديله الموبايل وكده هايبقى أأمن وارخص ليك

اللي بيقع في كشفين او اكتر في اول يوم هو ده اللي مش بيكمل لتاني يوم للاسف ومابيكونش ليه نصيب

لو حد وقع في كشف واحد بس في اول يوم بتكمل تاني يوم عادي وغالبا بيوقعك في كشف قاع العين عشان يبقوا كشفين وتخرج ولو موقعكش هاتتعرض على مستشار برتبة لواء او عميد واللي هو غالبا بيخرجك بردو

لو عديت اول يوم كشف بسلام 90% بتعدي تاني يوم وبناء عليه بتعدي الكشف الطبي كله بسلام

كشف قاع العين ده ملوش اي لازمة الا لو وقعت في كشف تاني زي حالاتي فبيستدخموه عشان يوقعوا الناس بيه والدليل على كده انه الكشف الوحيد للي دخلناه وكشفنا قبل ما ورق الكشف الطبي بتاعنا يدخل للدكتور اللي بيكشف ولما المندوب اللي معانا ندى على اسمائنا عشان ندخل كشف قاع العين زي في كل كشف ما بيحصل دخلنا تاني والدكتور طلعنا..وطبعا هو مش هايفتكر كشف على مين ولا على مين هو بس بيبص في ورقة الكشف الطبي بتاعتك ويشوف لو واقع في كشف ولا حاجة عشان يوقعك في قاع العين ويخلص منك وخلاص او يكتبك لائق وتتعرض على مستشار في الكشف اللي وقعت فيه وهاتخرج غالبا بردو.........يارب يكون كلامي واصل بس

لوعديت بسلام في اليومين بتيجي تالت يوم الساعة 12 تعرف النتيجة ولو عديت الكشف الطبي بكشف واحد بس بتيجي بردو تالت يوم بس الساعة 6.00 صباحا عشان تتعرض على مستشار ..

لاقدر الله لو خرجت في كشف م الكشوفات ماتزعلش نفسك ومتحسسش نفسك انك مستواك الطبي تعبان لا ابدا هي مسألة نصيب ويمكن تكون انت احسن من اللي دخلوا طبيا بس كل شئ نصيب وان شاء الله تلاقي نفسك في الحياه المدنية.

قبل كل كشف ابقوا سموا الله وادخلوا عادي ومتخافوش وان شاء الله كله هايعدي على خير

اعتقد الطبي مفيهوش واسطة الا لو واسطة جامدة جدا او ليك واحد دكتور موجود في كشف من الكشوفات

[b]

بجد موضوع اكتر من رائع ارجو من الادراة تثبيته
انا عندي كشف طبي بكرة واستفدت كتييييير من الموضوع
ربنا يكرمك والله انا سجلت في المنتدى مخصوص عشان اشكرك على التفصيل المملل (اللي طبعا مفيد جدا )

صحيح هم بيحددوا اختبار اللياقة البدنية بعد الطبي مباشرة ولا ايه النظام ؟؟؟؟ وبيكون بعدها بوقت قد ايه ؟؟؟؟؟؟؟؟؟ واوارق المرحلة التانية بعد الطبي ولا بعد اللياقة البدنية ؟؟؟؟