صحيح احنا عرب
معلش يا جماعة بس انا شايف اننا الحمد لله بنكمل فى المنتدى هنا مسيرة الفرقة العربية و الاختلاف العربى
عمالين نتناقش و نتعارك و نتفاضل كل واحد بنظام دولته او الفرقة اللى هو معجب بيها
بلا فائدة غير الرغى الكتير و الكلام اللى على الفاضى و الاتهامات المتبادلة و بس
معلش يا جماعة ننكسف على دمنا شوية بقى
لحد امتى حنفضل نتعارك و نعاير بعض
و بعدين احنا شعوب و ناس عادية سواء كانت الانظمة العربية او حتى اى نظام عربى بيعمل و لا بيسوى احنا نمشى وراه و نقول ده بيعمل و ده بيسوى و تعالى يا سورى و لا يا لبنانى و لا يا مصرى و لا اى جنسية عربية شوف بلدك عملت ايه؟
اساسا مافيش ولا نظام عربى جه الحكم بأنتخابات حرة نزيهة
يعنى لو اى نظام عربى عمل حاجة كويسة يبقى اهلا و سهلا لكن لو عمل اى حاجة وحشة يبقى غلطته هو مش غلطة كل الشعب بحاله
و خلى الطابق مستور عننا كلنا
من الاخر كدة الحمد لله عندنا فى المنتدى هنا ناس افكارها نظيفة و زى الفل و شباب مثقف و متعلم و عنده خبرات كويسة
يبقى نضيع كل ده فى مهاترات مش حتجيب نتيجة و تزود الفرقة ما بين العرب؟
يا جماعة اعتقد انه جه الوقت اللى نفكر فيه فى المستقبل و ازاى نطور نفسنا عشان بكرة و ايه اللى فى ايدينا نعمله دلوقتى عشان يقعد لنا بكرة ؟
الماضى و خرب خلاص و كلنا عارفينه و الحاضر و زى ما انتم شايفين
حلو اوى طب و المستقبل؟
لازم نفكر ازاى نعمل حاجة حتى لو كانت صغيرة بس تكون لبنة فى سبيل الوصول للتقدم و الرقى بكرة و خصوصا ان الحمد لله المنتدى هنا بيجمع بين جنسيات عربية كتيرة ما شاء الله
ارجو اننا نتناقش فى الكلام ده فى جو من المودة و الاحترام المتبادل و بلغة حوار راقية من كل الاعضاء و من المشرفين كمان
بدون ما نغلط و لا نستخدم اى عبارات ملهاش لازمة فى لغة الحوار و من غير ما نعاير بعض بأى حاجة حصلت من اى حد او بتحصل
اتمنى ان الكل يشارك على الاقل يبقى فعلا ادينا بنفكر صح
موضوع: لحد امتى؟ 
الثلاثاء 20 يناير 2009 - 11:54
