بعد انقضاء احداث اليوم ومرور 12 ساعة كاملة على الاشتباكات المتواصلة من الساعة 6:55 صباح اليوم وحتى فترة المغرب أحب أحط النقاط على الحروف وأطلع بالخلاصة وهاتكلم في كذا نقطة مهمة ..
1) معقول عدد الشهداء من الجيش 17 والمصابين 13 بس ؟
- أيوة معقول والجيش معندوش حاجة تمنعه يعلن عن عدد الشهداء لأنه ببساطة أعلن عن عدد أكبر من الشهداء قبل كده زي حادث الفرافرة ( 22 شهيد و4 مصابين ) وحادث كرم القواديس ( 29 شهيد و15 مصاب ) وحادث الكتيبة 101 ( 29 شهيد و80 مصاب ) فامش هاييجي النهاردة ومايعلنش عن العدد ، وكمان بالعقل والبديهة مافيش شهداء ومصابين بيستخبوا ياحضرات وفي كشوف اسماء بتتعرف وبتتنشر في الصحف واهالي الشهداء والمصابين مابيسكتوش ، يعني من الاخر هانجيبها يمين او شمال هايتعرفوا يعني هايتعرفوا يعني لو في أي زيادة هايتعرف ، وياريت ماننساش ان في كمان شهداء ومصابين من المدنيين .
2) هو الجيش قصّر في اللي حصل ؟
- طيب خلينا نقسم النقطة دي لشقين :
# شق استخباراتي والمقصود به عناصر المخابرات الحربية ، والمعلن والمتداول ان كان في معلومات عن هجوم وشيك هايحصل من قبلها بساعات ولكن ممكن نقول ان التقصير في جزئية عدم رصد الاسلحة والمعدات الجديدة اللي دخلت للعناصر التكفيرية لأننا بنتكلم عن منظومات صواريخ مضادة للدبابات ونسخ حديثة من الار بي جي وصواريخ محمولة على الكتف ورشاشات ثقيلة عيار 14.5 مم مضادة للطائرات وده بيؤكد ان لسة الانفاق ماتمش القضاء عليها كاملة وفي انفاق اطوالها بتتخطى الـ2 كم يعني فتحاتها موجودة بعد المنطقة العازلة في شرق رفح وعايزة المزيد من الجهود لكشفها والسيطرة عليها ، وكان لابد من معرفة مكان وموعد الهجوم بحيث يتم تنفيذ ضربة استباقية من قبل مايحدث اصلا ، ولكن برضه نرجع لنقطة المعلومات وحتمية وجود عملاء للمخابرات يكونوا مزروعين وسط عناصر التنظيم او على الاقل مرشدين من داخل القبائل اللي بينتمي لها بعض افراد التنظيم وهنا بيقابلنا مشكلة تانية إنهم بمجرد مابيشمّوا ريحة ان في حد بينقل اخبارهم للجيش او مع أول بادرة شك بيذبحوه فورا وحصلت كتير إنهم ذبحوا رجال ونساء من السيناويين وقتلوا ابناء لشيوخ القبائل وحاولوا اغتيال الشيوخ نفسهم اكثر من مرة ، ومعروف ياحضرات إن اي جهاز مخابرات عشان يعرف يجمع معلومات لازم يبقاله عملاؤه ورجالته في المكان المطلوب جمع المعلومات عنه والا مش هايبقى في فايدة من اي نوع ، يعني الخلاصة ان في تقصير وفي نفس الوقت في عراقيل .
# شق تنفيذي والمقصود بيه الارتكازات الأمنية والقوات المسؤولة عن التعامل مع الهجوم ، وده لازم وبكل وضوح وأمانة ندي فيه كل الحق للجنود والضباط اللي صمدوا بكل قوتهم ضد الهجوم المكثف المتعدد والمتزامن وقذائف الهاون اللي كانت بتنهال عليهم من كل مكان ومعروف جدا ان الهاون يصعب بشدة تحديد مصدره لأنه ببساطة محمول مع الافراد بمجرد مابيضرب بيتشال من مكانه ويتحرك الفرد بيه ويجري لمكان تاني فورا ويضرب ويتحرك ويفضل في حركية دائمة لغايت مايتم القضاء على الهدف بشكل كامل ، وطبعا احنا بنتكلم في عدد كبير مش مجرد فرد او 2 او حتى 10 افراد ، ونقطة التقصير هنا في الارتكازات الأمنية نفسها إنها محتاجة اعادة توزيع وتجهيز جديد ومناسب لمجابهة النوعية دي من العمليات بحيث يوفر الحماية الكاملة للأفراد ويديهم القدرة على البقاء والصمود لحين وصول الإمدادات ، وفي ارتكازات وكمائن بكل صراحة صمدت امام اكثر من محاولة للهجوم وتفجيرها ولكن مازال هناك تقصير في عدد مش قليل من الكمائن اللي محتاجة تتجهز وتتنظم اماكنها في اسرع وقت ، ومن ضمن النقاط اللي تحسب للجيش كمان تعامل القوات الجوية باحترافية مع الموقف فقامت الاف 16 بعمل مسح جوي سريع للمنطقة بالكامل عشان تحدد الاهداف اللي دخلت الاباتشي واتعاملت معاها فورا بخلاف الاف 16 نفسها اللي قصفت اهدافها وبكل دقة ، وكمان ولأول مرة يتم قصف سيارات العناصر وسط المباني مع المخاطرة الشديدة بأرواح المدنيين اللي تم اتخاذهم دروع بشرية واحتلال منازلهم لتقييد حركة الجيش وقدرته على القصف بسبب عقيدته القتالية الراسخة اللي بتمنعه من قتل الابرياء مهما كان الثمن ، وللأسف في شهداء من المدنيين سقطوا نتيجة تبادل اطلاق النيران وانهمار قذائف الهاون بخلاف من قتلوا على يد افراد التنظيم لرفضهم التعاون معهم .
3) العملية مختلفة بشكل كامل ومدبرة باحترافية عالية تخليني أكاد اجزم انها تمت بتخطيط من اجهزة مخابرات وكان الغرض منها احتلال اي ارض من الشيخ زويد او السيطرة عليها كلها ان امكن واتخاذ المدنيين دروع بشرية لمنع الجيش من التدخل ورفع اعلام داعش واعلانها امارة للتنظيم وضرب الدولة سياسيا واعلاميا ومعنويا في مقتل واظهارها بمظهر العاجز الغير قادر على السيطرة على الامور ، وكذلك ضرب احتفالية قناة السويس الجديدة ، ولكن بحمد الله وبفضله ثم بفضل قواتنا المسلحة ده ماحصلش ولا هايحصل واللي بيحصل في العراق او سوريا عمره ماهايحصل عندنا الا على جثثنا .
4) الخلاصة ان النهاردة كانت ملحمة ياحضرات والقوات المسلحة صمدت في قتال متواصل لـ12 ساعة تقريبا وفي عز الصيام والحر وقدرت تسيطر على الاوضاع وتقتل 100 ارهابي وتصيب عدد كبير رغم انها كانت من اصعب مايمكن لأننا بنتكلم عن مواجهة ضد عناصر لا تعرف الشرف ولا الرحمة ولا تقيم للحياة اي وزن وفي ظل وجود مدنيين في المنتصف وكل ده بدون خسارة جزء من الارض او اي مبنى في المدينة ، ولو كان الوضع ده حصل في مكان تاني احنا عارفين كويس النتيجة كانت هاتبقى ايه وكنا هانشوف مهزلة وجنود بتهرب واسلحة بتتسلم ومدن كاملة بتسقط في خلال ساعات .
في النهاية ياريت مانسلمش وداننا لحد بعد كده ومانصدقش اي شائعات بتطلع على الجيش ومانتهزش ونثبت ويكون ايماننا وثقتنا في الله وفي جيشنا وفي نفسنا اقوى من الف مليون شائعة وندرك اننا في حرب فعلية وكل شيء ممكن فيها ولازم نستعد لكل الاحتمالات .
حمى الله مصر واهلها وجيشها وتحيا مصر
منقول
موضوع: صمود الابطال موضوع للنقاش 
الأربعاء 1 يوليو 2015 - 21:48
لا احد يقول حماس . لان داعش توعدت باسقاط حكم حماس في غزة ( بيت المقدس تابع لداعش )
