ahmed eid كتب:

اسمحولى بقى اتكلم فى مجال تخصصى ..... " ادونا فرصة بقى"
انا لسه طالب فى كلية الهندسة بس اللى اعرفه كويس و دا لسه سامعه فى محاضرة من يومين ان اهم ميزة فى الحديد " الاستيل" انه غير منفذ للماء وللسوائل علشان كده بيدخل فى صناعات كتيرة بدل الاسمنت المسلح زى صناعة الطائرات و السفن و التانكات بجميع انواعها عكس الخرسانة المسلحة اللى بتعتبر منفذة الى حد ماء للماء بالاضافة ان الماء قد يتسرب داخل الخرسانة و دا هيسبب صدا حديد التسليح فى الخرسانة ودا يعمل كارثة لو ما اتعالجش بسرعة لان الحديد بيفقد اغلب مفاومته بعد الصدا...
دا بالاضافة ان الخرسانة مادة قوية جدا فى تحمل احمال الضغط بس ضعيفة جدا فى تحمل احمالل الشد علشان كده بنحط حديد تسليح فى المناطق المعرضة للشد " تلاحظوا ان الحديد بيبقى تحت فى الكمرات والاسقف لما بيجى يصبوا"
اما لو بنتكلم على احمال متغيرة زى تلاطم امواج البحر و مقاومة الرياح الشديدة والاعاصير دا غير احمال الصدم الناتجة عن اقلاع و هبوط الطائرات ودا جزء من الاحمال اللى المفروض حاملة الطائرات تشيله فانا ممكن اقول بكل بساطة ان اخر مادة ممكن تفكروا فيها هى الخرسانة دا بالاضافة لمهاجمات الكميائية الناتجة عن الكلوريدات اللى فى ماء البحر و تغير ارتفاع منسوب الماء بشكل مستمر كده اقدر اقول مافيش امل خالص
بس طبعا الصين متقدما جدا فى مجال الانشاء وانا اقدر اقول بكل ثقة انها رقم واحد فى العالم حاليا بمنافسة مع اليابان يكفى ان تعرف ان الصين بتستهلك اكتر من 75% من الحديد فى العالم و اكتر من 50% من الاسمنت
فالتفسير الوحيد للموضوع ده ان الصين استخدمت الخرسانةفى الانشاءات اللى على ظهر الحاملة او الانشاءات الداخلية فقط انما ان الحاملة مصنعة من الاسمنت ما اعتقدش برغم انبهارى بكسر الصين لكل قواعد التشيد اللى اخترعت ابسط مثال على ذلك الكبارى الخرافية اللى يستحيل تنفيذها عمليا بس هما عملوها
حاجة اخيرة ..اهم ميزة فى الحديد ان يقدر يشيل احمال كبيرة بمساحة مقطع صغيرة بالمقارنة بالاسمنت المسلح يعنى بدل ما اعمل عامود اسمننت40*60 ممكن استخدم عمود حديد اصغر من كده بكتير وبردوا هيشيل نفس الحمل على شان كده بيستخدم كتير فى ناطحات السحاب و الاماكن المفتوحة اللى مش محتاج احط فيها اعمدة كتير او محتاج لمساحة كبيرة فاضية من غير عمدان زى المطارات مثلا و الصالات المغطاه... و طبعا حاملة الطائرات محتاجة كل ميللى متاح فاعتقد حتى لو كان ممكن استخدام الخرسانة فى انشائها اعتقد ان استخدام الحديد افضل بكتير لانه هيوفر مساحات فاضية كتير دون الاخلال بتحمل الاحمال
ياريت ما اكونش خنقتكم بحصة الهندسة دى بس انا حبيت احطكم فى الصورة

واضح انك كنت مركز فى محاضرات الماتريال......انا كنت لسه حاخبط المحاضرة دى بس برده تشكر و لو اعرف اديك تقييم كنت اديتك

Gladiator كتب:

واضح انك كنت مركز فى محاضرات الماتريال......انا كنت لسه حاخبط المحاضرة دى بس برده تشكر و لو اعرف اديك تقييم كنت اديتك

و الله يا هندسة انا كنت عاوز اتكلم فى مجال تخصصنا
طبعا بما انى ماليش فى المواضيع العسكرية فبنستنا الخبراء هنا علشان يردوا عليها انما لما يكون الموضوع ليه علاقة بالهندسة لا بقى احنا ناخد فرصتنا هنا ولا ايه
المفروض كل واحد بيتكلم فى المجال اللى يعرفه فانا بناشد المهندسين هنا لما يكون الموضوع له علاقة بالهندسة انهم يتدخلوا و يعرفوا الناس الموضوع ماشى ازاى
و المقصود من كلامى اننا نحاول اثراء المواضيع على قدر الامكان
و بالنسبة للماتريال دى اكتر مادة انا بحبها فى الكلية او بمعنى اصح دى المادة اللى بجيب فيها تقديرات كويسه و بصراحة عندنا فى اسكندرية دكاترة مارتريال على اعلى مستوى بجد يكفى ان عندنا دكتور عدلوا جزئية فى الكود الامريكى بسببه بجد الناس دى عاوزين يعلمونا تعليم بجد و بيبذلوا مجهود خرافى على شان كده اسأل اى خريج من اسكندرية هتلاقيه يقولك اكتر مادة فاهمة كويس و حافظها و بيحبها هى الماتريال
و شكرا لمرورك يا هندسة

اكيد ليهم وجهة نظر وابحاث معينة