السلام عليكم

أنا أول يوم ليَّ في المنتدى النهاردة و سعيد جدا إني لقيت منتدى عربي ضخم مهتم بالأمور العسكرية اللي أنا شخصيا بعشقها لكن الله يلعن أبو الظروف اللي شغلتني في الحياة المدنية و دخلتني جامعة القاهرة.

أنا اسمي احمد من مصر عمري 21 سنة, طالب في آخر سنة كلية اقتصاد و علوم سياسية قسم علوم سياسية شعبة انجليزي. 

هبدأ من الأول و أحكي قصتي:

أنا من وانا صغير كان دايما نفسي أطلع ظابط في القوات الخاصة, وانا طفل كنت على طول مغرم بالقوات الخاصة و شكلها و اسلحتها و كانوا بالنسبة لي مثلي الأعلى بالرغم إني معرفش ولا واحد منهم لا من قريب ولا من بعيد.

عشت في السعودية فترة طويلة و لكن رجعت في الثانوية العامة و دخلت علمي و جبت مجموع سياسة و اقتصاد و دخلتها بناء على رغبة أهلي اللي كانوا خايفين عليَّا من الحياة العسكرية و القسوة في الكلية الحربية لكن خوفهم ده ماخلانييش اتخلى عن حلمي للحظة و هو إني ابقى ظابط في القوات الخاصة مستقبليا. 

فضلت اقرا في الموضوع و أشوف هل ممكن حد يقدم على الكلية الحربية بعد الجامعة و لقيت انهم ينفع, بس بيتم اختيارهم بناء على اعلان كل سنة بيتم الاعلان فيه عن التخصصات المطلوبة و لو اتقبلو في الكلية دراستهم بتختلف تماما عن الطلاب اللي دخلوا الكلية الحربية كطلاب مقاتلين بعد مخلصو ثانوية عامة أو ما يعادلها. 

السؤال هنا, أنا عندي شوية امل إن شاء الله إن الاعلان القادم اللي هو المفروض في شهر أكتوبر هيطلب تخصص سياسة و اقتصاد تاني لانه طلبه السنة اللي فاتت - خصوصا و إن الكلية في آخر 3 سنين أصبحت كلية قمة و مجموع دخولها يكاد يكون زي مجموع دخول الطب البشري.


 و لكن ما زال عندي سؤال و هو اللي محيرني جدا; هل ممكن لو دخلت الكلية و أنا معايا شهادة سياسة و اقتصاد يتم تاهيلي و ترشيحي للانضمام للقوات الخاصة إذا اثبت كفاءتي , ولا هدرس ال 6 شهور بتوع طلاب الجامعة في الحربية و آخد الشهاده العسكرية و أحطها جنب بتاعت سياسة و اقتصاد في البيت؟


و السؤال التاني, هل إذا تقدمت و اتقبلت إن شاء الله في الكلية الحربية  بعد مخلص سياسة و اقتصاد,  يتم اعفائي من الخدمة العسكرية الاجبارية ولا دي حاجة منفصلة؟ و لو حاجة منفصلة, مين بيكون قبل التاني؟

ألف شكر مقدما على الإفادة.

Abd_elrahman2011 كتب:

مكان استفسارك خاطىء..يمكنك وضع استفسارك فى قسم الكليات والمعاهد العسكرية

وعموما ما أعرفه أن أكاديمية الضباط المتخصصين عند إعلانها عن التخصصات المطلوبة فإنها تحتاج لهذه التخصصات لأغراض معينة ومطلوبة

وأن اختيار ضباط القوات الخاصة يكون من طلبة الكلية الحربية والبحرية على وجه الخصوص

ولكن كل شىء وارد..وركز على التحاقك بالأكاديمية أولا ثم فكر فى مسألة التحاقك بالقوات الخاصة

شكرا على الرد, معلش أعذر جهلي أنا أول مرة أكتب في المنتدى ده.

بس ممكن حضرتلك توضحلي اللي قلته, هو في فرق بين الأكاديمية بتاعة الظباط المتخصصين و الكلية الحربية؟ أصل أنا قريت إعلان السنة اللي فاتت و كان مكتوب إن الباب مفتوح للي عايز يتقدم للالتحاق "بالكلية الحربية" من حاملي الشهادات الجامعية في التخصصات المطلوبة و تكون مدة الدراسة 6-7 شهور.

و حضرتك مجوبتنش برضو على السؤال الاخير اللي هو: هل إذا تقدمت و اتقبلت إن شاء الله في الكلية الحربية  بعد مخلص سياسة و اقتصاد,  يتم اعفائي من الخدمة العسكرية الاجبارية ولا دي حاجة منفصلة؟ و لو حاجة منفصلة, مين بيكون قبل التاني؟


و شكرا ليك

في القسم الخاطىء

ينقل الى  قسم الكليات والمعاهد العسكرية