الأقســـام غير العسكريـــة

الارقــــــــــــــــام

اولا انريد نحجيها بصراحة و بلكت انحط النقط فوك الحروف

ثانيا الطلي نفس الطلي مال الفواتح و من كبر سمو خروف

ثالثا ضاعت الحسبة علينه و مفتهمنه بين المتهم و المدعي العام و القاضي رؤوف

رابعا اذا كنت متهم لا سامح الله لا توكلك محامي ترة غامضة كل الضروف

خامسا ياهو كام و كض الدف يغني كلها غنت كلها دكت بالدفوف

سادسا كان عدنا يوم عاشر من محرم يوم طف و هسة كل ايامنة صارت طفوف

سابعا الامان الجان عدنا ضاع منه و دورينة و مالكينة بس لكينة بدارنا زرعو الخوف

ثامنا صرنة للعالم قضية و بطلو ما ناقشوها وانست فوك الرفوف

تاسعا جان عدنة صنم واحد نحلف براسة صدك لمن نجذب و هسه عدنا اصنام كد عينك تشوف

عاشرا جان بس حجاج واحد عدنا شايل بيدة السيف و هسة الف حجاج يلطع بالسيوف

حادي عشر خلني ساكت لا تحاجيني اعله بختك ميليشيات هواي و القائد عطوف

ثاني عشر لا تصدك يا اخي اتصير النه جارة عفنة بيت الله الـ بمكة ورحنة عند البيت الابيض نحتمي و كلنة نطوف

ثالث عشر كبل بالتوقيف من انام نكدر ننتجي و نمد رجلنة و هسة بالتوقيف نومونه وقوف

رابع عشر جنه من نعطش يروينا نبع دجلة و فرات وهسة عطشانة و علي حتى الجروف

خامس عشر جان عدنة جيش باسل جان سده اعله الحدود و حلو الجيش الجماعة و القرار بريمر الهز الجتوف

سادس عشر هاي وين و ذيج وين شما ضربنة شما قسمنة شما جمعنة شما طرحنة يطلع الناتج صفر جوة الالوف

سابع عشر ما اكلك وضع الناس جان زين بس الشمس من تطلع خجولة اشوه من شمس الكسوف

ثامن عشر الهاونات التضرب وسط المناطق تكطع الرجلين و تكص الجـــفـــــــــــــــوف

تاسع عشر ديمقراطية التهجير هذي الطبقوها اتعوف بيتك لو صدك عمرك تعوف

عشرين الخطيب الجان يخطب يبدي وينتهي برص الصفوف هسة صارت مهنته يفرق الصفوف

واحد و عشرين من الرصافة اتريد تعبر للكرخ بدل اسمك يا علي سميه عمر و من الكرخ تريد تعبر للرصافة بدل اسمك يا عمر سميه علي بكلت يبعدون عنكم يا علي و يا عمر يوم الحتوف