العقرب الفتاك كتب:

السلام عليكم

دا اول موضوع ليا واتمنى يعجبكم

انا قرات مواضيع كتيره جدا فى المنتدى وبصراحه لقيت عدد كبير جدا من الاعضاء بيتمنى ان مصر تشترى الطائره الروسيه SU 35 او الفرنسيه رافال او التايفون او F-15 او حتى f 16 البلوكات الحديثه والميج 29 وبصراحه انا كنت بزعل اوى لما اشوف دا لان دا بيقلل من عقليه المهندسين بالجيش المصرى ومن قدراتهم واننا اخرنا نشترى وبس

انا بالنسبه ليا ان مصر تنتج طائره مصريه محليه الصنع 100 % احسن من 100 طائره F 22 او F 35 لان انت مهما اشتريت الحديث هيطلع الاحدث وهتفضل تحت رحمه صناع السلاح وتحكماتهم ومهما اشتريت سلاح عمر صناع السلاح ما هيديك الاحدث وانت مش هتقدر تشترى كل الاسلحه اللى انت عايزها لان دا هيكلفك كتير

وانا عندى اشوف طائره مصريه محليه الصنع وتحمل اسم بالعربى زى القاهره او حلوان زى مايكون دا افضل عندى مليون مره اننا نشترى حتى لو كانت الطياره دى مش قويه للدرجه بس طالما هى من صنعك تقدر تطورها وتخليها اقوى واحسن وتقدر تخليها اقوى من غيرها وتقدر تنافس بيها الدول التانيه

بس اهم حاجه هتقدر تتحكم فى سلاحك وهتقدر تنتج الكميه اللى انت عايزها وهتفلت من رحمه الدول المصنعه

وانا شايف ان القوات المسلحه بدل ماتشترى طائرات زى su 35 او غيرها وتصرف عليها مليارات لا تستثمر الفلوس دى فى طائره محليه الصنع واعتقد ان دا اللى بيحصل وهقول وجهه نظرى

انتم اخر مره سمعتم عن صفقات للقوات الجويه امتى ؟ اعتقد دا من فتره طويله جدا

طب كل الفتره دى ياترى ميزانيه القوات الجويه راحت فين اعتقد انها ملهاش تفسير غير كدا وخصوصا ان قيادات الجيش عاوزه تدخل عالم صناعه الطائرات وبقوه ودا بيظهر لما بييجوا يتفاوضوا على صفقه نسمع ان قياداتنا عاوزه مواصفات معينه فى السلاح وكمان التوطين وفى الاخر بتنتهى الصفقه بالفشل زى ماحصل فى su 35

اتمنى ان كلامى يطلع صح واتمنى ان انتم توافقونى وبدل ماكل شويه نقول نتمنى نشترى لا نقول نتمنى اننا نصنع ,واننا مش بس نصنع طائرات لا معظم انواع السلاح بس الطائرات هى اهمهم

ياترى انتم معايا ولا لا

السلام عليكم ورحمة الله وبركاته
بصراحة حضرتك قولت اللى كان على لسانى فعلا ده اللى لازم يحصل وبصراحة حاسس اننا اتاخرنا كتير فى الحكاية دى وده الوقت الوحيد علشان ناخذ كل ما نريد من الدول الكبرى ونستغل رغبة كل منهم فى تحييدنا لصفها
السلام عليكم ورحمة الله وبركاته

يا جماعه أنتم بتتكلموا عن التصنيع كأنه شيء سهل.



سدقوني والله صناعة الطائرات شيء في غاية الصعوبه لأنه بيعتمد على النانو تكنولجي و الطاقه و الأيدي العامله الخبيره و صناعه مدنيه تكون قويه و خبره و أبتكار في التصنيع.





هتولي واحده من دي بس موجوده في مصر

mood128 كتب:

1-طبعا التصنيع مهم جداا لكن دلوقتى عاوزين مقاتله سياده جويه زى السوخوى 35 علشا تسند دهرنا - وبعدين نتعمق فى الصنيع المحلى للمقاتلات
2- اما اذا كانت المقاتلات المصنعه محليا لها مواصفات جباره ولو اقل قليلا من اى طائره سياده جويه فانا افضل المحلى ولو اتعرض علينا f22
3- الاحتمال الثالث اللى انا بحبه قوى اننا نشترى مقاتله جويه بجانب تصنيع الطائره المحليه

السلام عليكم ورحمة الله وبركاته
بصراحة انا لا اوافق حضرتك فى الرأى
1- حضرتك بتقول عايزين مقاتلة سيادة جوية زى السو35 طبعا علشان نعمل توازن مع العدو وطبعا امريكا هتزود اسرائيل باحدث منها يعنى هنفضل برضه فى حالة خلل توازن وخصوصا ان السو 35 ممكن اسرائيل تتحصل على اسرارها فى صفقة فاسدة مع الروس من الباطن ( بصراحة تطبيق نظرية المؤامرة بين الدول الاسلامية مع باقى دول العالم هى احسن طريقة لتوقع الاسوء )
2- باذن الله هتكون فى نفس مواصفاتها وزى الاستاذ العقرب الفتاك قال اننا بنطلب مواصفات خاصة احنا اللى حاطينها فى كل الاسلحة اللى بنشتريها يبقى اكيد بقت عندنا الخبرة مع وجود طائرة صناعة مصرية من ايام الستينات ( القاهرة 2000)وخصوصا انها كانت بمواصفات جيدة جدا ايامها باذن الله هنتفوق
3- باذن الله لو قدرنا نعمل طائرة محلية ما اظنش اننا هنحتاج نشترى اسلحة من بره وخصوصا ان ربنا وهب لنا عقل جبار ودايما المهندسين المصريين بيثبتوا الكلام ده فى كل المجالات
السلام عليكم ورحمة الله وبركاته

semsem55 كتب:

يا جماعه أنتم بتتكلموا عن التصنيع كأنه شيء سهل.



سدقوني والله صناعة الطائرات شيء في غاية الصعوبه لأنه بيعتمد على النانو تكنولجي و الطاقه و الأيدي العامله الخبيره و صناعه مدنيه تكون قويه و خبره و أبتكار في التصنيع.





هتولي واحده من دي بس موجوده في مصر

السلام عليكم ورحمة الله وبركاته
اوافق حضرتك ان صناعة الطائرات مش سهلة بس لاحظ ان مصر عملت الاقهرة 2000 حتى لو كان المصمم المانى والشركة اسبانية بس معنى ان مواصفات الطائرة وقتها كانت جيدة اذا لقد احسنا اختيار المصمم والشرة واكيد ده بسبب خبرة كويسة وبعدين الاقعدة الصناعية موجودة فى مصر هى بس محتاجة قرار سياسى
لو على الالكترونيات مصر بالتاكيد عندها الامكانيات انها نعمل اى جهاز واى الكترونيات
الايدى العاملة معروف ان العمال المصريين الافضل عالميا
الصناعة المدنية لاحظ ان عندنا الجيش صناعاته مختلفة عن الصناعات المدنية يعنى بيفصل الاتنين كده صناعة الطائرات المقاتلة هيبقى مشروع نفصل مش هيمتد الى تصنيع طائرات مدنية
الخبرة موجودة باذن الله والدليل التطويرات اللى بتحدث للاسلحة
ابتكار فى التصنيع الحمد لله موجود برضه وزى ما قولت الحكاية محتاج قرار سياسى
السلام عليكم ورحمة الله وبركاته

السلام عليكم , انا معك اخي , لكن اتمنى ان تحصل مصر العزيزة على ١٥٠ رعد محلي +٩٠ سو٣٥ ١٠٠او رافال ، مع شروط نقل تقنية .....بالتوفيق لاخوتي بمصر

الامنيات سهلة والكلام اسهل بكتتييييييييييير ولكن الواقع مختلف وصعب ومر جدااااااااااا
ببساطة علشان توصل لتصينع او طائرة مقاتلة علي ارضك محتاج مدة زمنية ماحدش يقدر يحددها علشان تقدر تملك التصميم المناسب لياحتيجاتك وده بيتوقف كتيييييير علي القدرات الفكرية في بلدك
ولو فرضنا هنشتري مشروع او تصميم جاهز زي الحلوان300 يبقي اختزلنا فترة التصميم وانتقلنا مباشرة لتجميع اول نموذج وبعديها هنحتاج مايقرب من 3 الي 5 سنين تجارب تشغيل ده لو مازدتش اصلا عن كدا وبعديها استني ربما 3 سنوات اخري لتصل للتصنيع والانتاج الكمي علي ارضك
طوووووول الفترات دي انت كل الي بتعمله بتصرف فلوس فقط ومفيش عائد نهائيا والاخطر من كدا انت لحد انتاج اول نموذج عامل انت مش متأكد من نجاح المشروع او قدرة الطيارة دي وعندك خير مثال علي كدا الاف35 رغم التفوق الامريكي والمشاركة الدولية فيها ولكن حتي بعد تسليم اول سرب يتفاجءو بعيوب فيها!!!! فمابالك بيك وانت تعتبر دي اول تجربة لمقاتلة عندك
افضل حل عندك دلوقت تشتري تكنولوجيا التصنيع زي مابيحصل مع الاف سي 1 وبرغم ضعفها كطائرة لدولة مثل مصر ولكن احسن من مفيش و ماحدش بيدأ من فوق وصفقة الاف سي1 التصينيعة بتختذل علينها حوالي 10 سنين صرف فلوس بس
انا مش بحاول احبطك ولكن بوضح ليك الحقيقة وطبعا انا مااتكلامتش في الجانب السياسي او التقني في الموضوع لانهم معقدييييين جدا ويكفي فقط ان اقول لك ان محاولتك الاولي مع الحلوان300 انتهت بأعدامها رميا بالميج21 لان مفيش دولة في حالة حرب وجزء من اراضيها مغتصب وتستمر في تصنيع طائؤرات
بالنسبة لحوارات تصنيع الميراج في الثمانينات فصراحة انا ميال الي ان فعلا يوجد ميراج جمعت في مصر ولكن للاسف رغم كل المصادر ولكن في رأي اننا لا نملك حجة او دليل قاطع علي ذلك بأغلب مصادرنا بتتكلم عن ان اعداد الميراج هي اضعاف اضعاف مارأينها ده طبعا غير الاحتفلات الاخيرة الي اكدت ان الميرااج اعدادها اكبير بكتييييير من المعلن
بالنسبة للقاهرة2000 فنصيحة علشان ماتتفقعش ماتفتحش كلام فيها مع حد سواء بيفهم او مش بيفهم
حتي لا تحبط من كلامي
مصر تصنع قطع غيار الميراج وتصنع اجزاء من الاف16 وتعمر محركات الاف16 وباقي طائراتها \ تصنيع اجهزة التعرف علي الصديق\ تصنيع الصاروخ سواندير سايد نسخةp \ تصنيع طائرات التدريب بألأكامل تصنيع وتجميع العديد من انواع المرحويات وقريبا ان شاء الله تصنيع السوبر بوما او طائرة مروحية اوربية غيرها في مصر كبديل للجازل (ماحدش يقولي مصدر ده مجرد توقع)

semsem55 كتب:

يا جماعه أنتم بتتكلموا عن التصنيع كأنه شيء سهل.



سدقوني والله صناعة الطائرات شيء في غاية الصعوبه لأنه بيعتمد على النانو تكنولجي و الطاقه و الأيدي العامله الخبيره و صناعه مدنيه تكون قويه و خبره و أبتكار في التصنيع.





هتولي واحده من دي بس موجوده في مصر

النانو تكنولوجي مصر لديها علماء ممتازين في هدا المجال و خلي رائد يقولك كام واحد و كل واحد بعمل ايه و أول قمر صناعي مصري بالنانو تكنولوجي .

أنهي طاقة مش فاهم ولا هو أي كلام و خلاص ؟ بترول ؟ غاز طبيعي ؟ شمسية ؟
نووية مستقبلا ؟

الأيدي العاملة الخبيرة و الصناع المهرة موجودين بكفائات عالية و اقرأ المواضيع عن هيئة الانتاج الحربي و الهئة العربية للتصنيع و اعرف كم المهندسين و العاملين بها و اقرأ تصريحات الفريق وهيبة أن انشاء و تعليم و تطوير و اقامة الكوادر الكفئة هي هم الهيئة الأول .

بلدك مش ناقصها غير التمويل و الاهتمام بالبحث العلمي .

و ياريت تفتكر انك مصري و تنقد برأي صحيح مش لمجرد النقض و خلاص لأن كلامك بيحبط الناس المبتدئة أو مش ملمة بأبعاد الموضوع و ياريت مكوثك في الامارات علي ما أتدكر ميأثرش علي حاجة تانية .

شكرا جميع الاخوه 
بس انا عايز اقول التصنيع ليس سهلا زى مابعض الاعضاء اتفضلوا وقالوا بس احنا قادرين على تحقيق دا وخصوصا مع وجود حليف زى الصين واوكرانيا الى جانب الهند ومتنسوش ان كل حاجه ولها تمن فى عالم المصالح 
وانا كمان عايز اضيف حاجه ميزانيه القوات المسلحه لاتتحمل شراء صفقه طائرات الى جانب التصنيع المحلى لان مصر ليست غنيه جدا زى دول الخليج ومن الصعب جدا توطين صناعه طائرات الرفال وsu 35 لان التوطين مكلف جدا مع اصرار الدول المصنعه على التمسك بصناعه نسبه معينه من الطائره وهنرجع تانى لتحكمات الدول المصنعه

انا متوقع اننا هنسمع مفاجات من العيار التقيل من القوات المسلحه بعد الثوره لان قبل الثوره النظام كان يدين بالولاء للثور الامريكى واسرائيل والاعلان عن اى سلاح قوى كان هيثير غضب امريكا واللى بدورها كانت هتظغط وهتهدد النظام للتخلص من السلاح دا وعشان كدا كان الجيش يعمل فى سريه تامه لكن الوضع اختلف بعد الثوره لان اى ضغط امريكى هيقابله ضغط شعبى اقوى وامريكا هتخاف ان ينقلب الشارع المصرى عليها زى ماحصل مع اسرائيل وعشان كدا انا متاكد ان القوات المسلحه هتكشف عن حاجات محدش كان يتوقعها وانا اتوقع ان واحده من الحاجات هى الاعلان عن طائره محليه الصنع دا احساس ممكن يصيب وممكن يخيب 

صح ..ننقل التكنولوجيا من الصين و روسيا ولو اتاخرنا شوية مش مشكلة هنوصل فى الاخر و متنسوش ان مصر صنعت الميراج فى الثمانينات و ضهرنا مسنود كويس من قواتنا البرية و حلفائنا العرب

1-قرار تصنيع اي قطعة حربية هو قرارا سياسي بالدرجة الاولي و ليس عسكري
2- احنا ممكن بدل ما نبتدي نصمم لسه من اول و جديد ممكن نشتري رخصة تصنيع زي معاملنا في M1A1 بالاضافة ان احنا عندنا الخبرة و الفنيين نتيجة تصنيع ال K8 بنسبة 90% و بنتتج و بنعمل صيانة لمحرك الاف 16
3-و ممكن زي متفضل الاخ why not نخش في مشروع مشترك مع الصين و السعودية كمان تخش معانا بس ده قرار سياسي و ممكن امريكا تضغط علينا احنا و السعودية لنتراجع