الأقســـام غير العسكريـــة

ننفرد بتسجيل الاتصال الهاتفي الذي تم بين الرئيس مبارك وبين رئيس هيئة المعاشات
وفيه يعترض الرئيس على مبلغ الــ 2000 جنيه كمعاش شهري .. ..

- أيوه يا صبحي ..

- ايوه مين؟

- انا الريس يا بني ادم ..

- ريس مين؟

- هيكون الريس عمر حرب؟ .. الرئيس محمد حسني مبارك ..

- محمد حسني مبارك ؟؟؟؟؟ ... الاسم ده مش غريب عليا ..

- نعم يا حبيبي!! .. مش غريب عليك ؟؟

- أنا آسف يا فندم أصل العملا عندنا كتير .. والأسامي متشابهه ..

- يا ابني أنا الرئيس .. محمد حسني مبارك ..

- صدقني يا افندم مش فاكرك .. الاسماء كتير بقول حضرتك ..

- الضربة الجويه ..

- ضربه جوية ؟؟ يا ساتر يا رب .. ده مجنون ده ولا إيه ؟ ..

- انتصارات اكتوبر ..

- يا أفندم مش فاكرك صدقني !!..

- انا اللي اتخلعت من يومين !!.. العيال بتوع جمعة النرفزة .. المولتوف .. الراجل اللي ورا عمر سليمان !!

- اهلااااا اهلااااااااا يا سيادة الريس حصل لنا الشرف .. خير؟؟

- هو فيه خير من بعد عملتك المهببة ..

- عملة ايه بس يا ريس كفا الله الشر ..

- المعاش !!

- معاش ايه ؟

- متركز يا صبحي .. المعاش بتاعي .. 2000 جنيه بس ؟؟

- ايوه يا ريس فعلا ..

- فعلا في عينك .. وهو ده كلام؟! .. يعني انا 30 سنه خدمه وفي الاخر معاشي 2000
جنيه بس؟

- يا ريس صدقني كل حاجه محسوبة بالورقة والقلم ..

- قلم لما يخش في (.....) .. محسوبة إيه ؟؟ .. الرقم ده يتغير .. 2000 مينفعوش .. زود كمان 3 أصفار ..

- يا نهار مش فايت .. عايز 2 مليون في الشهر ؟؟

- كمان في الشهر ؟؟ .. هو المعاش مش بينزل يوم ويوم ؟

- يوم ويوم؟ .. انت قاعد في كنتاكي؟؟ .. والرقم اللي بتقوله ده مستحيل ..

- انا اتظلمت يا صبحي في المعاش .. والظلم طعمه وحش مانت عارف ..

- عارف يا ريس .. دايقة 30 سنه ..

- بعدين متنساش اني دلوقتي بقيت عاطل عن العمل .. و متزوج وأعول طفلين ..
والعيال وأمهم طلباتهم مبتخلصش..

- حاسس بيك يا ريس بس صدقني انا بشتغل بالورق .. وكل حاجه محسوبة في المعاش ..

- متاكد انه كل حاجه محسوبة ؟؟

- ايوه يا ريس ..

- حسبت الضربه الجوية طيب؟

- حسبتها يا ريس ..دي لوحدها عامله الف جنيه ..

- يا نهار مش فايت ..يعني الضربه عامله الف .. والتلاتين سنه عاملين الف لوحدهم ..

- بالظبط يا ريس ..

- امال لو كنت عملت بأصلي وقعدت مدتين بس (8 سنين) كان هيبقى معاشي كام؟؟!

- لا ده انت كده هيبقى عليك فلوس يا ريس ..

- جامد تحرير يا صبحي !! .. بس مش ناقصة خفة دم ..

- طب استني احسبهالك ..

- تحسب ايه يا بني ادم ؟ .. لا تحسب ولا تجمع .. اسمع..

- أؤمرني يا ريس ..

- عايزك تجس نبض الشعب ..

- اجسه ؟؟ .. ليه يعني ؟؟

- انت عارف يا صبحي أن الشعب بتاعنا عاطفي ..

- ايوه ..

- وميرضاش ان الريس بتاعه يبقى معاشه الفين جنيه بس ..

- مش فاهم برضه ايه المطلوب ..

- شوفهم كده لو موافقين ارجع واقعد 30 سنه كمان اعمل فيهم بس الف تانيه
للمعاش يبقى كتر خيرهم .. الــ 30 سنه هيعدوا كأنهم شكة دبوس ..

- يا ريس حتى لو وافقوا .. انت عندك 80 سنه .. ده انت مش بعيد تتوفى بعد المكالمة دي ..

- مفيش رئيس بيموت يا صبحي .. مأنت عارف قوانين الكون ..

- ربنا يديك الصحه يا ريس ..

- طب اسمع ..

- أؤمرني ..

- انت بتقول ان الضربه الجوية عامله باكو بحاله ؟!

- اه ..

- وانت فيه عندك كام ضربه في الملف بتاعي ؟..

- واحده بس يا ريس .. ضد اسرائيل ..

- والضربه بألف ؟

- ايوه ..

- طب والنص ضربه ؟؟

- دي بقى تسأل فيها أشرف فرغلي ..

- بس انا ملاحظ ان الحاجات سعرها قليل قوي .. همه خلعوني في موسم الاوكازيون ولا ايه ؟ ..

- أؤمرني انت بس يا ريس وقولي بتفكر في إيه ..

- بفكر اطلع بطياره هليكوبتر من شرم وهضربلي ضربتين تلاته كمان .. يعني عايز 3000 جنيه زيادة مفهوم ؟؟

- انا معاك يا ريس .. بس انت هتشعللها على اسرائيل تاني ؟؟ .. احنا مش ناقصين ..

- ونبص لبره ليه ؟؟ ... مهي بلدنا أولى بالضرب .. والحاجات اللي تنضرب فيها كتير ..

- خلاص يا ريس .. اضرب انت وابعتلي التقارير وانا هتولى حساب المعاش .. بس متنساناش في الحلاوة ..

- لا يا صبحي أرجوك .. لا حلاوة ولا دياولو .. انا اتغيرت بعد الثورة ..
لن أرشي .. ولن أرمي شيء في الشارع .. ولن أتعدى على حقوق المواطنين ..

- عفارم عليك يا ريس .. وانت علبال ما تزبط الحاجات دي انا هطلعلك إذن صرف
بالألفين جنيه -بتوع الشهر ده .. تحب احطهملك على كارت (ايه تي ام) ..

- لا يا صبحي .. احب اخدهم كاش في إيدي .. ويا ريت الألفين كلهم معدن ..
عشان احس بحلاوتهم .. اهو اطلع بأي حاجه من الشعب الفظيع ده لحد ما تفرج ..

- ونعم الاختيار يا ريس ..

- طلب أخير يا صبحي ..

- عيون صبحي يا ريس ..

- الدبابات والمدرعات لسه في الشارع ؟؟

- ايوه يا ريس .. انت بتفكر ترجع ولا إيه ؟

- يا ريت يا صبحي .. بس لأ ..

- امال ايه ؟

- الواد جمال عايز يلحق يتصور صورتين معاهم يحطهم عالجروب بتاعه .. (نعم لجمال مبارك رئيساً لمصر)..

- لسه موجودين يا ريس .. متقلقش .. و حتى لو رجعوا .. هحوشلك دبابة على
جنب و ابعتهالك (دي اتش ال) .. جمال يتصور معاها وبعدين نبقى نرجعها تاني
مع اخواتها ..

- أصيل يا صبحي ..

- خدامينك يا ريس ..

- طب يا صبحي هسيبك بقى عشان آخر دقيقة في الموبايل ..

- مع ألف سلامة يا ريس ..

- سلام يا صبحي ..

كلييييك !!!

ههههههههههههههههههه
جامده

حالته اتدحضرت خالص
ياحرنكش

هههههههههههههههههههههههههههه جامده

اتمنى تكون عجبتكم ...وشكرا على مشاركتكم الفعاله

للاسف بياخد معاش عسكرى اد كدة على قلبه

MoHaMeD SaaD كتب:: للاسف بياخد معاش عسكرى اد كدة على قلبه

هيستفيد به ازاى ؟ الكفن مالهوش جيوب .لكن مبارك عمل لكفنه جيوب ,انت شفت قبر مبارك اللى بنيه .ولا الفراعنه والله العظيم

شكرا على المشاركه الفعاله واتمنى تكون عجبتكم...اموال مبارك لن تعود تنفعه بعد الان , ما فائده المليارات وانت فى السجن لا تستطيع استغلالها

» محضر الاتصال الهاتفي بين الرئيس الأميركي جورج بوش والرئيس المصري حسني مبارك قبل قمة بغداد الاستثنائية / 23 مايو 1990
» محضر الاتصال الهاتفي بين الرئيس جورج بوش والرئيس السوري حافظ الأسد بعد قمة القاهرة الطارئة في 10 آب اغسطس 1990
» محضر الاتصال الهاتفي بين الرئيس جورج بوش الأب والرئيس اليمني علي عبد الله صالح بشأن ازمة الرهائن الغربيين في 1 سبتمبر 1990
» محاولة اغتيال وكيل لجنة الصحة في مجلس الشعب الذي يتولي نقل المخلوع لطره
» المنهج الجديد للصف السادس الابتدائى يتضمن فصلاً كاملاً عن المخلوع مبارك وأهم انجازاته..

الأقســـام غير العسكريـــة

تواصل الأعضاء

الاتصال الهاتفي الذي تم بين الرئيس المخلوع مبارك و رئيس هيئة المعاشات

الاتصال الهاتفي الذي تم بين الرئيس المخلوع مبارك و رئيس هيئة المعاشات

مواضيع مماثلة

مواضيع مماثلة